Respekt

Begéint Ären Nopere mat Respekt:

• Sidd héiflech a frëndlech.
• Respektéiert d’Privatsphär vun Äre Matmënschen.
• Hëlleft Ären Noperen aus (Bréifkëscht eidel maachen, Poubelle erausstellen etc.).

Déieren

Eis Frënn op véier Patte solle keen anere stéieren:

• All Hond muss op der Gemeng ugemellt ginn.
• Profitéiert vun eise Bëscher, fir mam Hond spadséieren ze goen. Sollt et emol virkommen, datt Ären Hond säi Geschäft an der Stad, um Trottoir etc. verriicht, raaft de Kéipchen op.
• Haalt Ären Hond bannent den Uertschaften un der Léngt.
• Hënn sinn um Kierfecht, am Schoulhaff an op der Spillplaz verbueden.
• Evitéiert, datt Ären Hond konstant billt.

Kaméidi

• An Ärem Gaart méinen, d’Hecke schneiden etc. ass vu méindes bis samschdes
  tëscht 7 an 20 Auer erlaabt, awer sonndes an d’Feierdeeg net.
• Denkt och an der Nuecht un Är Noperen a respektéiert d’Rouzäiten tëscht 22 a 7 Auer.
• Loosst keng Motoren (Auto, Maschinnen etc.) onnéideg lafen.
• Är Nopere freeën sech, wann Dir net ze haart Musek lauschtert oder spillt.

Dreck

Et ass fir jidderee méi agreabel, an engem propperen Ëmfeld ze liewen:

• Geheit Ären Offall an d’Poubelle, net op de Buedem.
• Geheit Ären Haushaltsoffall net an déi ëffentlech Poubellen oder bei d’Noperen.
• Haalt den Trottoir virun Ärem Haus propper.
  Geheit Är Zigarettekippen net op de Buedem.

Feieren & Grillen

• Sot Ären Noperen am Viraus Bescheed, wann Dir eng gréisser Feier hutt. Nach besser: Invitéiert si op e Patt.
• Bei Iech doheem dierft Dir bis 23 Auer grillen.
• An eiser Gemeng gëtt et och ëffentlech amenagéiert Grillplazen, déi Dir kënnt benotzen: zu Lasauvage, am Stengercherswee Richtung Lasauvage, um Vesquenhaff an am Kannerbongert zu Nidderkuer.
• An eisen ëffentleche Parken ass d’Grillen net erlaabt.

Am Gaart

Schneit Är Planzen am Gaart esou, datt si déi ëffentlech Weeër an Är Noperen net behënneren.

Op der Strooss

• Haalt Iech un d’Vitesslimitatiounen, virun allem virun de Schoulen a fir d’Kanner an Ärer Noperschaft.
• Stellt Iech op déi gezeechent Parkplazen.
• Stellt keng Afaarten zou.
• Stellt Ären Auto net op den Trottoir. Mënsche mat Rollstull oder Kannerkutsch soen Iech Merci.

Schnéi & Glatäis

Am Fall vu Schnéi oder Glatäis, raumt den Trottoir virun Ärer Dier.